Ministrin e kap “zorra qorre”, operohet e trajtohet “profesionalisht” (VIDEO)

Dhimbjet e sollën në orët e vona të së enjtes  ministrin e shëndetësisë Rifat Latifi e në Klinikën Emergjente.

Pas ekzaminimeve  të këtushme, ministri Latifi u pranua në Klinikën e Kirurgjisë Abdominale,  ku dhe u operua nga zorra qorre.

Pos ekipit kujdestar të përbërë nga kirurgët Lulzim Salihu, Valon Zejnullahu dhe Driton Komoni, televizioni merr vesh se Latifi e ka thirrur  kirurgu Enver Fekaj  nga shtëpia për  ta kryer këtë intervenim kirurgjik.

Njëherësh Fekaj është edhe kandidat në konkursin për drejtor të kësaj Klinike.

Ky i fundit e ka konfirmuar për televizionin se e ka kryer operacionin e Latifit.

Pas intervenimit ministri për trajtim të mëtejmë u dërgua  në Klinikën e Anestezionit me Mjekim Intensiv, i cili u vendos në një dhomë me një pacientë -fëmijë.

E, këtë rekomandim që Latifi të hospitalizohet në këtë klinikë dhe jo në atë të Kirurgjisë e mori anesteziologia Shpresa Hasimja në koordinim me shefin e KAM-it, Shaqir Uka dhe me operatorin Enver Fekaj.

Anesteziologia Hasimja tha për KlanKosovën se marrjen e këtij vendimi e kanë parë të arsyeshme, ngase kanë qenë orët e vona kur është kryer intervenimi dhe se nuk ka dhomë të zgjimit në Kirurgji, derisa thekson se ministri nuk ka kërkuar asnjë privilegj dhe i ka përfillur të gjitha procedurat me korrektësinë më të madhe.

 

 

Lajmet Ministrin e kap “zorra qorre”, operohet e trajtohet “profesionalisht” (VIDEO) >> Rahoveci.info.